Öskubuska mín! Lausn er í sjónmáli

Ég las í erlendu blaði fyrir stuttu lýsingu á foreldrahlutverkinu sem ég gat að mörgu leiti samsamað mig við. 

Ég hef ákveðið að þýða greinina og staðfæra því líka var verið að bjóða einfaldar lausnir sem ég hef ákveðið að prufa eða allaveganna taka til skoðunar.

Níu mismunandi hlutverk móður:

1.Matreiðslumaður   

Vandi: Vinnan sem matreiðslumaður rekst alltaf á við venjulegu vinnuna.  Hver hefur tíma til að standa heima og búa til mat.  Eftir langan tíma og mikla vinnu eru börnin orðin svo svöng og ergileg að þau neita að smakka.

Lausn: Bjóða svona þokkalega hollan fljótmatreiddan mat, eins og t.d. núðlur að minnsta kosti einu sinni í viku.  Látið börnin hjálpa til við að gera sallad.  Ef þau fá að vera með þá eru minni líkur á að þau neiti að smakka.

2. Innkaupastjóri

Krónan, Bónus, Hagkaup, Nóatún, 11-11, 10-11 endalausar ferðir með innkaupakerruna og kaupa mjólk, brauð og þetta klassíska sem aldrei virðist vera til "eitthvað gott". Það sem verra er að maður virðist alltaf vera á síðustu stundu að versla og með svöng börn sem bíða.

Lausn: Gera reglulega stórinnkaup.  Senda svo börnin út eftir ferskvörunum í hverfisversluninni.

3.Þvottakona  

Vandi: Tölfræðin segir að fjórar af hverjum fimm konum eru með meginábyrgðina fyrir þvottinum.  Mjög miklar líkur eru því á að fjórar af hverjum fimm konum bölva þvottinum á hverjum degi.  Það virðast vera endalausar birgðir af fötum sem þarf að flokka, þurrka, brjóta saman eða ganga frá í skápana. Þegar það er búið þá eru þvottakörfurnar orðnar fullar aftur.

Lausn: Að þvo er hvimleitt en afskaplega auðvelt.  Leyfið börnunum að setja í vélarnar, hengja upp þvottinn og sækja sín föt sjálf.  Ef þú treystir þeim ekki til að sortera þá má flokka þvottinn í merktar körfur.  Umbunin er augljós – Ef þú þværð ekki þá færð þú engin hrein föt......

4.Uppvaskari   

Vandi: Fjölskyldan virðist nota meira leirtau en meðalstór veitingastaður.  Eftir hverja máltíð og allir eru staðnir upp þá ert þú eftir í lengri tíma í að vaska upp, setja í uppþvottavélina, þvo potta og ganga frá.

Lausn: Komdu á skipulagi – og fylgdu því eftir! Flestum finnst allt í lagi að sjá um uppvaskið einstaka sinnum og sumum börnum finnst meira að segja skemmtilegt að vaska upp.  Plágan er bara þegar maður þarf að sjá um þetta alltaf.

5.Ræstitæknir  

Vandi: Allan daginn er hún að vinna, taka til og þrifa ... Alveg eins og mýsnar sungu um Öskubusku.  Getur verið að þetta eigi við þig?  Þrátt fyrir alla þessa vinnu er aldrei fullkomlega hreint.  Heimilið vegur salt á milli þess að vera þokkalegt og algjör kaós.

Lausn: Láttu alla bera ábyrgð á að taka til eftir sig..... á hverjum degi. Ef það virkar ekki, beittu hörku.  Það sem liggur í reiðileysi á gólfinu fer í ruslið.  Óvinsælt en áhrifaríkt.  Láttu alla hjálpast að við stórhreingerningu einu sinni í viku.  Umbun, svo sem bíóferð, sparimáltíð eða eitthvað skemmtilegt, virkar mjög hvetjandi. 

6. Þjónn  

Vandi: Allir setjast til borðs.  Þú leggur á borðið, setur matinn á borðið, skerð brauðið og matinn fyrir þau yngstu og hina kannski líka fyrst þú ert á annað borð með hnífinn á lofti. Hinir byrja að borða en þú ferð og nærð í eldhúsrúlluna, leita að sleifinni og þurrkar upp mjólkina sem helltist niður.  Þegar þú loksins byrjar að borða þá eru hinir búnir.  Þá er kominn tími til að taka af borðinu.

Lausn: Allir sjá um sitt.  Hafðu svo rúllandi skipulag um það hver leggur á borðið eða gengur frá.

7.Kennari  

Vandi: Að sjálfsögðu þarf að hjálpa börnunum við heimanámið. En... stundum getur þetta verið yfirþyrmandi og maður getur ekki endalaust verið hvetjandi “Svona nú bara eitt dæmi í viðbót. Þú getur þetta alveg” Hlýða yfir fyrir próf eða útskýra fyrri heimstyrjöldina, mól eða ljóstillifun þegar þú ert kannski ekki alveg með svörin á tæru þó þú hafir kunnað þetta allt einu sinni.

Lausn: Leyfðu eldri börnunum að hjálpa þeim yngri.  Hjá þeim er námsefnið ennþá í fersku minni og svo gleðjast þau yfir ábyrgðinni sem þeim er falið og þau finna hvað þau eru dugleg.

8.Einkabílstjóri     

Vandi: Einn þarf að fara hitta vini sína í öðrum bæjarhluta.  Annar þarf að fara á æfingu og enn annar í bíó.  Enginn nennir að taka strætó.    

Lausn:  Fáðu aðra foreldra lið með þér og skiptist á um aksturinn.  Segðu nei – fáir hafa látist af því að ganga eða hjóla smá spöl, svo ég tali nú ekki um almenningssamgöngur.

9.Verkefnisstjóri  

Vandi: Þú veist ekki hvenær þetta gerðist en allt í einu ertu orðinn sjálfskipaður verkefnisstjóri hjá Fjölskyldunni ehf. Þú berð ábyrgð á að allir muni eftir leikfimidótinu sínu, vakni á réttum tíma, mannst alla fyrirfram auglýsta atburði og að sjálfsögðu þarftu að vita hvar allir skapaðir hlutir eru niðurkomnir.  Lífið er ein allsherjar skipulagning og allir koma til þín og spyrja um nákvæmlega allt.

Lausn: Slepptu takinu!  Kannski verður smá upplausn til að byrja með en smám saman leysist þetta þegar allir gera sér grein fyrir að þeir bera ábyrgð á sér sjálfir.

Heimasíðan mín

    http://spaces.msn.com/itarefni

             Kveðja Ólöf Dagný